اهديت له ورده من الحب حمرا
وقلت العروق اللي بقلبي ينادون
لي كل ليله مع حراويك مسرا
يعقبه صبحٍ باصدق الحب مقرون
يا فل يا ريحان يا ضي بدرا
ياللي له ابقلبي غلا حيل مصيون
بالقلب من حبك وقيدٍ وجمرا
من يطفي النيران قلي وبالهون
غلاك ليّن قلبي اليوم قسرا
حبٍ له اعروق المعنى يلبون
اغليك ياللي دوم ع البال تطرا
يا غاليٍ حبه جليٍ ومأمون
نفحت غرامك ع العشاشيق اطرا
من ماي هتانٍ تّهْمل به امزون
وادموع عيني من سبايبك حدرا
دمعٍ سبايب شوق ساطي ومجنون
عُسر الليالي معك ذا اليوم يسرا
اسعدت قلبٍ كان مبلي ومحزون
زرعت لك في داخل القلب بذرا
بِذرة غلا تنبت بساتين وغصون
وفوق الغصن قُمري يغني ويقرا
بيوت شعرٍ بعذب اوزان ولحون
انت بغلاي اليوم فاهم وادرا
تدري باني فيك ذايب ومفتون
عذرا عن التقصير باللهِ عذرا
عجزت بيوت الشعر بالوصف يوفون
