مات الجمر و قلوب الأحباب حيه .... و الموت لا ماتت قلوب الحبايب
يا شيشتي لو فيك ذنب و خطيه .... معاك أحس إني عن الناس غايب
العام كانو لي من الأصحاب ميه .... وقت الرخا لكن جفو بالنوايب
لا هنت يا قلب شكى من خويه .... كم راس من طعنات الأصحاب شايب
مرات أقول إن الخبل يا هنيه .... و لقيتهم يشكون ظلم القرايب
و مرات أقول النذل لا رحم حيه .... و أثر النذل في بعض الأوقات صايب
يا نفس شيليها على السامريه .... شيلة طرب ما عاد فيها طلايب
وش لي بتنبيه القلوب العميه .... و حنا بهالدنيا دروب و ركايب
أبتغزل في هذيك البنيه .... بنت تفل القلب فل الذوايب
كم بعثرتني و أجمعتني هنيه .... بنفس المكان اللي جمعنا غرايب
مرباعها بين العيون الشقيه .... و مقيظها بين الجروح العطايب
يا ضعفها معهم و عندي قويه .... منها غدا ثلثين قلبي خرايب
ما أقول يذبح زينها بس هيه .... تلفت لها عود عن الحب تايب
و لا أقول مغروره و لا هي خليه .... فيها دلع طفل تبناه شايب
جمال نجد و قتنة حايليه .... وش جمع الثنتين فيها عجايب
اليا اقبلت بين حسنات و سيه .... يا كثر ذنبي بين طيب و غصايب
و اليا ادبرت في دمعتين نديه .... قلب معاها و قلب في الصدر ذايب
راح العمر ما بين روحه و جيه .... يا كثر غلطاتي و لاني بتايب
شب الجمر مادام الأشواق حيه .... و طف العتب و العمر ضحك و مصايب
الكآتب \ حمد السعيد
.
تحيااتي
منقوووووع
